Actualitat: notícies e nòtes de premsa
El Proòm dera Val hè balanç deth convèni de supervision singularizada dauant es administracions araneses
13/07/2010
Pendent eth 2009, eth Sindic de Grèuges de Catalunya qu’en Aran adòpte eth nòm de Proòm dera Val tramitèc 9 queishes e 17 consultes, en totau 26 actuacions, 3 mès qu’eth 2008. Des 9 queishes presentades per abitants dera val, 7 hègen referéncia a administracions araneses: 2 deth Conselh Generau, 4 der Ajuntament de Vielha e Mijaran e 1 der Ajuntament de Naut Aran.
Eth proòm Rafael Ribó a dat aguestes donades en transcors d’ua trobada damb representants des administracions araneses, entestades peth sindic d’Aran Francés Boya. Eth convèni de supervision singularizada siguec signat per Boya e Ribó en junh de 2009. Des d’aqueth moment, eth Sindic de Grèuges, convertit en Proòm dera Val aufrís ua vedença singularizada de supervision e contròle deth Conselh Generau que se concrète damb era elaboracion d’un informe anuau que recuelh es queishes enviades en relacion damb es administracions d’Aran.
Per tèmes, es queishes recebudes procedentes dera Val d’Aran, 3 hègen referéncia a diferentes problematiques de miei ambient com contaminacion acustica, odorifèra licéncia d’activitats. Tres mès, auien a veir damb er apartat d’administracion publica, ua referida ara administracion locau, ua aute ara foncion publica e ua tresau afectaue un tèma de responsabilitat patrimoniau dera administracion. Es autes tres queishes èren de tèmes d’urbanisme, enfància e actuacion des fòrces de seguretat.
Coincidint damb aguesta trobada de presentacion deth prumèr Informe de supervision singularizada, eth proòm Rafael Ribó a participat en acte institucionau de reconeishement der autogovèrn d’Aran e eth 20au aniversari dera lei de regim especiau deraVal. Tanben s’a amassat damb eth sindic d’Aran, Francés X Boya.
Eth Proòm recep 6 queishes e 3 consultes en desplaçament dera oficina tà Vielha
12/07/2010
Era oficina deth Sindic, qu’ena Val d’Aran adòpte eth nòm de Proòm dera Val s’a desplaçat tà Vielha entà atier dirèctament es queishes e es consultes des abitants d’aguesta localitat e de tot Aran. En totau, es membres der equip deth Sindic an recebut 9 visites, que s’an materializat en 6 queishes e 3 consultes. Tramitacion de multes de transit, actuacion des còssi policiaus, sanitat, gestion administrativa dera immigracion, contròle dera normativa per part des administracions an estat quauqu’ues des tematiques plantejades.
Eth desplaçament se hè en compliment deth convèni de supervision singularizada signat en junh de 2009 peth sindic d’Aran Francés Boya e eth sindic de grèuges Rafael Ribó. Des d’aqueth moment, eth Sindic de Grèuges, convertit en Proòm dera Val aufrís ua vedença singularizada de supervision e contròle deth Conselh Generau que se concrète damb era elaboracion d’un informe anuau que recuelh es queishes enviades en relacion damb es administracions d’Aran. Tanben se desplace periodicament tà Aran entà atier presenciaument a totes es persones que volguen presentar queishes contra es administracions o hèr consultes.
Ath delà, eth proòm e membres deth sòn equip an visitat era casèrna des Pompièrs e era comissaria des Mossos d’Esquadra de Vielha e s’a mantengut ua reunion damb membres dera entitat de defensa der aranés Lengua Viua.
Aguest ei eth dusau viatge qu’eth Proòm desplace era oficina tà Vielha despús dera signatura deth convèni. Hec un prumèr desplaçament en octobre de 2009. Anteriorament auia desplaçat dus viatges mès era oficina tà Vielha, en junh des ans 1998 e 2008.
Era visita de Ribó e eth sòn equip ena Val d’Aran se barrarà deman eth dia 13 de junhsèga quan eth proòm dera val aurà ua trobada institucionau damb es autoritats dera Val, entestada peth sindic Francés Boya entà presentar es donades deth prumèr Informe de supervision singularizada. Tanben a participat en acte institucionau de reconeishement der autogovèrn d’Aran e eth 20au aniversari dera lei de regim especiau dera Val.
Eth Sindic considère anacronica, inadequada e ineficienta era decision deth Tribunau Constitucionau sus er article 78 der Estatut
30/06/2010
Eth Sindic, en ua prumèra avaloracion deth veredicte deth Tribunau Constitucionau sus er Estatut, constate un amendriment deth dret der autogovèrn en Catalunya e des volentats democratiques que l’avalen, e tanben de quauqui drets, com ei eth dera lengua preferenta des administracions, maugrat qu’encara se tròbe en fasa de deliberacion eth recors qu’afècte a tot eth títol de drets der Estatut.
En çò que hè ara institucion deth Sindic de Grèuges, eth Tribunau Constitucionau a declarat era inconstitucionalitat deth tèrme d’exclusivitat recuelhuda en article 78 der Estatut d’autonomia de Catalunya, que se referie ara supervision qu’eth Sindic podie exercir de forma exclusiva entà controlar era Administracion dera Generalitat e es ens que i son vinculadi.
Se considère un anacronisme pr’amor qu’enes democràcies contemporanèes a on i a un modèl descentralizat deth poder –ja sigue de tipe federau o autonomic–, com succedís en estats com Reiaume Unit, Belgica, Àustria e Argentina, quan i a una institucion d’ombudsman d’encastre regionau que contròle era Administracion regionau, se i coexistís ua institucion estatau, aguesta darrèra non interven enes ahèrs regionaus. En aguest sentit, era decision deth TC ei mercadament anacronica, extemporanèa e impròpria d’un modèl d’estat descentralizat com eth que se correspon ar Estat autonomic.
Eth Proòm dera Val en Vielha. Atierà as persones eth deluns 12 de junhsèga
28/06/2010
Er equip deth Sindic, qu’ena Val d’Aran adòpte eth nòm de Proòm dera Val, atierà as visites des des 10 e enquiàs 13 e des 16.30 e enquiàs 18. ores en CEIP Garona, carretèra de Betren 78. Eth desplaçament se hè en marc d’un convèni de collaboracion signat entre eth Sindic e Conselh Generau d’Aran.
Aguest convèni establís qu’eth Proòm aurà d’aufrir ath Conselh ua vision singularizada dera sua actuacion ena Val d’Aran. Aguesta se concretarà, entre d’autes causes, ena trametuda ath Conselh d’un informe anuau que recuelhe era situacion des queishes gestionades referentes ara Val e ua estadistica des consultes provinentes de persones e entitats dera Val d’Aran que s’agen atengut des deth Proòm.
Tà demanar visita, prèviament cau concertar era entrevista, trucant tath telefon 900 124 124, o enviant un messatge tara adreça electronica sindic@sindic.cat, indicant eth nòm e eth numero de telefon entà poder contactar damb era persona.
Eth Sindic recomane cambis normatius entà esvitar es desigualtats enes servicis de transpòrt e minjador escolars
06/05/2010
Propòse includir es critèris de distància geografica e renda economica entà gaudir d'aguest servici gratuïtament e non eth d'escolarizacion en un aute municipi diferent deth de residéncia des alumnes, er unenc previst ena normativa actuau.
Aguesta prepausa ei un des suggeriments que recuelh er informe extraordinari La provisió i l'accés als serveis de transport i menjador escolars, qu'eth sindic, Rafael Ribó, a liurat aué ath Parlament. Entre es ans 2007 e 2009 a recebut 69 queishes relacionades damb eth transpòrt escolar e 73 damb eth minjador escolar. En tres ans eth nombre de queishes s'a doblat.
Er informe expause que i a comunitats autonòmes qu'an prebotjat normatives tà ampliar era gratuïtat deth servici e qu'incorpòren critèris de distància geografica (distància deth domicili ena escòla superiora a tres quilomètres), de configuracion urbana (municipis damb nuclèus disseminats), de besonh economic (baish nivèu de renda familiara), de besonh educatiu (alumnat damb discapacitat escolarizat en centres ordinaris) e, ath delà, non ac limiten as ensenhaments obligatòris. En Catalunya non s'establissen cap d'aguesti supausats.