Quan pòt intervier eth Sindic?

Quan es administracions publiques o enterpreses que presten servicis d'interès generau (electricitat, aigua, gas, telefonia) cometen bèra irregularitat o quan damb era sua actuacion vulneren drets d'ua persona o d'un collectiu.

Ath delà, eth Sindic pòt investigar possibles grèuges per discriminacion. A eth manament especific de garantir es drets deth collectiu LGTBI e de velhar pera igualtat de genre. Tanben a eth prètzhèt d'avalorar eth grad de compliment dera Lei de transparéncia per part des administracions e determinadi ens. Coma Mecanisme Catalan de Prevencion dera Tortura pòt visitar sense avís toti es centres penitenciaris, comissaries, geriatrics, etc.

Pòt intervier per iniciativa pròpria o a partir des queishes.

Quan no pòt intervier?

Non pòt intervier en qüestions privades com ara disputes entre familiars, vesins, comerciants, litigis per accidents de circulacion, etc. Ei a díder, se se tracte de conflictes entre particulars, trèt des casi de possible discriminacion de genre entre particulars, qu’eth Sindic pòt investigar, maugrat que non è capacitat sancionadora.

Tampòc non pòt intervier en queishes anonimes, que denòten mala fe o non an pro fondament ni en ahèrs ja jutjadi o pendenti d'ua resolucion judiciau.

Entà qué servís eth Sindic?

Enes resolucions publicades en web e enes informes annaus i a nombrosi exemples d'actuacions enes quaus era intervencion deth Sindic a servit per reparar ua situacion injusta o ua irregularitat. Son casi enes quaus era Administracion o enterpresa implicada a acceptat e dat compliment as recomanacions emetudes. Atau, veiratz qu’era actuacion deth Sindic servís soent entà cambiar es critèris d'accés a prestacions, entà revocar sancions, entà dar ua responsa ara peticion d'informacion, entà agilizar eth pagament d'ajudes pendentes, entà modificar normatives, entà dar d'alta eth servici de subministraments, etc.

Qui pòt hèr usatge deth servici deth Sindic?

Quinsevolh persona fisica, damb independéncia dera nacionalitat, era edat o era situacion legau, pòt presentar ua queisha ath Sindic de Grèuges.

Aquerò includís menors d'edat, persones granes, interns de presons, estrangèrs (damb permisi o sense), foncionaris, cargues electes (com ara deputats, senadors, còssos municipaus) etc.

Tanben pòden presentar queishes es persones juridiques, coma societats mercantils o associacions de tota sorta: sindicats, partits politics, organizacions non governamentals, plataformes ciutadanes.

Voi presentar ua queisha mès mè hè pòur que prenen represalhes

Era actuacion deth Sindic ei confidencial. Es donades dera persona que presente ua queisha son reservades, trèt deth cas qu’eth contingut madeish dera queisha o era sua actuacion personau comporten ua renóncia ad aguesta confidencialitat. 

Guaire còste eth servici deth Sindic?

Eth Sindic ei accessible a toti e eth servici ei totaument gratuït, inclosa era atencion telefonica, mejançant eth 900 124 124.

Eth Sindic pòt sancionar?

Eth Sindic hè recomanacions, mès non è competéncies entà sancionar ne obligar a complir es sues resolucions, que non son vinculantes. Totun, eth grad d'acceptacion des recomanacions per part dera Administracion supère eth 90%

Guaire trigaràn a resòlver eth mèn cas?

Depèn molt deth grad de complexitat dera queisha e deth temps que trigue era Administracion o enterpresa a facilitar-nos era informacion. I a viatges que se solucione en pòqui dies i en d'autes pòt trigar mesi. Er objectiu deth Sindic ei redusir eth temps de tramitacion ath maxim.

Qué podem hèr se non èm satisfèti damb era responsa deth Sindic?

D'acòrd damb era Lei deth Sindic, non se pòt presentar cap recors as resolucions emetudes peth Sindic. Era Lei tanben determine qu’eth Sindic a de rendir compdes ath Parlament.