Notícies
Eth Síndic recep 7 quèishes e 8 consultes ena sua visita a Vielha
Era oficina deth Síndic de Greuges s'a desplaçat tà Vielha. Er objectiu d'aguest desplaçament ei divulgar e apropar era institucion as persones e auferir era possibilitat que poguen presentar quèishes o hèr consultes sus es administracions.
En totau, es membres der equip deth Síndic an recebut 12 visites, que s'an materializat en 7 quèishes e 8 consultes. Entath Síndic tanben ei ua ocasion tà conéisher de prumèra man es problematiques dera vila e mantier un contacte mès dirècte damb es persones.
Aprofitant era sua visita, Rafael Ribó, a hèt tanben ua presentacion der Informe 2007, incidint especiaument enes problematiques detectades ena Val d'Aran. Era presentacion, ei adreçada especiaument a organizacions e entitats sociaus, e servís tanben ath Síndic entà mantier un dialòg dirècte damb es representants deth teishut associatiu.
Tanben s'a presentat era version en aranés deth web deth Síndic e eth servici de presentacion de quèishes per videconferéncia des de Vielha. Aguest nau servici serà possible gràcies ath convèni qu'eth Síndic a signat damb er Ajuntament de Vielha entar usatge dera Bibliotèca. Ribó a visitat er espitau de Vielha, era residéncia entara gent d'edat Sant Antòni e era comissaria des Mossos. Eth defensor des persones e d'auti membres deth sòn equip s'amassaràn damb eth sindic d'Aran, Francesc Boya entà parlar dera defensa des drets en Aran.
Entad açò que tanh as actuacions procedentes d'abitants dera Val d'Aran, eth Síndic inicièc er an passat 9 actuacions, 3 quèishes e 6 consultes. En 2006 sigueren 12 (5 quèishes e 7 consultes). Vielha e Mijaran damb 2 quèishes e 4 consultes siguec eth municipi d'a on se receberen mès actuacions en 2007.
Des de 1996, era oficina deth Síndic ja a efectuat 68 desplaçaments per Catalunya, 34 durant aguest mandat deth síndic Ribó. Er anterior abans de Vielha siguec Banyoles. Aguest ei eth segon viatge qu'eth Síndic desplace era oficina tà Vielha. Hec ua prumèra visita en junh de 1998.
