Notícies

El Proòm se desplace tad Aran entà recuélher queishes des ciutadans e visitar diuèrsi equipaments

Eth sindic de grèuges de Catalonha, e proòm dera Val d'Aran, Rafael Ribó, s'a desplaçat tara Val d’Aran entà atier es queishes e es consultes dera poblacion d’Aran. Er an 2008 eth Sindic signèc un convèni damb eth sindic d'Aran entà recuperar era figura deth proòm coma garant des drets ena zòna. Er acòrd establie eth compromís deth Proòm d'utilizar er aranés enes sues comunicacions e materiau de difusion, e d'elaborar un informe sus es accions amiades a tèrme en Aran. Aguest acòrd se refortilhèc damb era signatura er an 2012 d'un convèni de supervision singularitzada. Dempús dera signatura, eth sindic s’a desplaçat aumens un còp l’an tad aguest territòri entà recuélher queishes e consultes des persones, mès tanben entà amassar-se damb entitats representatives o visitar equipaments d’interès public.

Maugrat qu'eth Proòm a canaus abilitadi entà presentar queishes dempús de quinsevolh lòc deth mon, eth hèt d'apropar-se as localitats mès aluenhades dera sedença en Barcelona li permet conéisher in situ es problematiques e es grèuges dera zòna. En aguest desplaçament s’an atengut 5 persones per tèmes de consum, urbanisme, miei ambient, estrangeria e participacion ciutadana.

Ath delà, eth proòm a mantengut ua amassada institucionau damb eth sindic d’Aran, Francés X. Boya, e damb eth baile de Vielha e Mijaran, Juan Antonio Serrano.

Eth desplaçament tanben a servit pr'amor qu'eth sindic e membres dera sua equipa podessen visitar e mantier reünions damb es responsables des installacions de l’Espitau de Vielha, deth comissariat des Mòssos d’Esquadra de Vielha e eth parc de pompièrs.

Tornar