Notícies
Eth Sindic de Grèuges (Proòm dera Val) reivindique es drets sociaus, era sostenibilitat e era defensa des libertats deuant era vulnerabilitat creishenta, eth cambi climatic e era erosion de drets civius
Pendent er an 2019 a recebut un totau de 10.543 queishes procedentes de 22.993 persones. Tanben a atengut 8.843 consultes e a iniciat 222 accions d’ofici. E, en globau, s’an tramitat 26.358 expedients e s’an atengut mès de 30.000 persones
A causa der aument de queishes relatives a situacions d’emergéncia sociau, cau ua accion immediata dera Administracion que dongue responsa efectiva as mès de 1.300 unitats de convivéncia afectades
Er emparament dera biodiversitat d’espacis en projèctes urbanistics, d’infrastructures o extractius an supausat un milèr de queishes ath Sindic
Eth madeish an dera signatura deth Pacte contra era segregacion escolar ja s’an metut en marcha diuèrses des accions que preve
Sus es mainatges e adolescents migrants sense referents familhaus, cau desplegar de manèra urgenta ua estrategia d’integracion d’aguesti adolescents e joens migrants en es diferenti municipis de Catalonha
Eth Sindic a aprovat eth sòn prumèr Plan d’igualtat entath periòde 2019-2022 en encastre dera igualtat efectiva de hemnes e òmes
Eth sindic de grèuges, Rafael Ribó, acompanhat pes dus adjunti, Jaume Saura, e M. Jesús Larios, a liurat aué ath president deth Parlament, Roger Torrent, er informe annau dera institucion der an 2019.
Enguan, es queishes e es accions d’ofici entorn der emparament de drets sociaus an tornat a constituïr eth blòc d’accions recebudes mès nombrós, damb un 32% des iniciades pendent er an. Tant en encastre dera educacion, fonamentauments per queishes motivades per accès a centres e preinscripcion, coma en encastre dera salut, per listes de demora e per queishes relatives as drets e déuers des pacients, i a agut un aument de queishes respècte der an anterior. Er increment mès significatiu a estat es situacions d’emergéncia residenciau, soent damb mainatges afectadi.
D’auta banda, es politiques territoriaus, qu'includissen miei ambient, urbanisme e mobilitat, supausen apròp de 30% des queishes iniciades en Sindic pendent er an 2019. Ath sòn torn, es drets de persones consumidores representen ath torn de 10% des queishes e mès de 20% des consultes recebudes pendent aguest exercici.
Ampla acceptacion des resolucions deth Sindic e melhora dera satisfaccion damb era accion deth Sindic
Des actuacions finalizades, s’a detectat berà irregularitat en un 49,3% des casi e, d’aguesti, en un 37,7% s’a solucionat eth problèma sense que siguesse de besonh ua resolucion deth Sindic.
En relacion damb era acceptacion des resolucions deth Sindic, e en tot seguir era tendéncia d’ans anteriors, ei remercable qu'en 98,7% des casi en que s’a detectat ua accion irregulara dera Administracion e eth Sindic a recomanat o suggerit mesures, aguestes an estat acceptades totauments o parciauments.
Un aute hèt que conven destacar ei era eficacitat deth Sindic, mesurada ena resolucion des problèmes e eth compliment des resolucions que prèviaments an estat acceptades totauments o parciauments pera Administracion. En aguest sens, en un 63,7% s’a resolvut eth problèma o s’an complit es resolucions deth Sindic, mentre qu'un 36,2% des casi encara son en vies d’execucion.
Per çò qu'ei deth grad de satisfaccion deth servici recebut, un tèrç des persones qu'an responut era enquèste se senten fòrça satisfètes o satisfètes. Era nòta mejana obtenguda, damb un escalèr deth 0 a 10, a estat un 6,76 e melhore substanciauments era der an anterior, qu'ère un 6,1.
Dempús dera implementacion dera sedença electronica, ei oportun soslinhar qu’eth 65% des persones usatgères qu'an responut era enquèste de satisfaccion manifèsten que l’an utilizat, e un 85,2% s’an mostrat satisfètes o fòrça satisfètes deth sòn foncionament.
