Notícies

Eth Sindic de Grèuges e Pròom dera Val se desplace tà Vielha entà atier es grèuges der Aran

Eth sindic de grèuges, Rafael Ribó, cargue qu’en Aran exercís damb eth nòm de Proòm, s’a desplaçat tà Vielha entà recuélher es queishes e consultes des aranesi.

Pendent era atencion, qu’a agut lòc en Aula de Formacion de Vielha, a atengut 8 persones, que li an presentat queishes e exposat consultes sus diuèrsi tèmes. Es mès destacadi an estat tèmes relacionadi damb era Covid, eth torisme e es drets sociaus.

Pendent eth 2020 eth Proòm recebec 7 queishes e 7 consultes relacionades damb er encastre de politiques sociaus (salut, pes mesures derivades dera aparicion dera COVID-19; enfància, adolescéncia e educacion, frut des afectacions enes mainatges des mesures restrictives adoptades, e servicis sociaus, per accès ath centre de dia de persones dependentes), seguit pes encastres de politiques territoriaus e d’administracion publica e tributs. Totes aguestes donades se pòden consultar en en l’informe anual dedicat a l’Aran.

Er an 2008 eth Sindic de Grèuges de Catalonha signèc un convèni damb eth sindic d’Aran entà recuperar era figura deth proòm coma garant des drets en Aran. Er acòrd establie eth compromís deth Proòm d’emplegar er aranés enes sues comunicacions e materiau de difusion, e d’elaborar un informe sus es actuacions amiades a tèrme en  Aran. Aguest acòrd se reforcèc damb era signatura er an 2012 d'un convèni de supervision singularizada. 

Maugrat qu’eth Proòm a canals abilitadi entà poir presentar queishes de quinsevolh lòc deth mon, eth hèt d’apropar-se as localitats mès aluenhades dera seu en Barcelona li permet conéisher in situ es problematiques e es conflictes dera zona, en aguest cas des aranesi, damb es administracions e es enterpreses que provedisses de servicis basics.

Tornar